Biokol: stabilt lenge, men ikkje evig

Biokol er eit karbonrikt materiale som blir laga ved å varme opp biomasse ved høg temperatur og oksygenfattige forhold – ein prosess som heiter pyrolyse.

Når biokol blir tilført jorda, kan det lagre karbon i svært lange periodar – i gjennomsnitt over 1 000 år – samtidig som det forbetrar jordhelsa og fruktbarheita på jorda. Dette gjer biokol til ein av dei mest robuste naturbaserte metodane for å fjerne CO₂ frå atmosfæren.

Ein nyleg publisert kommentar i GCB Bioenergy framhevar at kor lenge biokol varer, avheng både av eigenskapane til materialet og av miljøfaktorar som jordtype, klima og biologisk aktivitet – det vil seie kor mykje liv det er i jorda.

– Biokol er svært stabilt, men ikkje evigvarande. Små mengder vil brytast ned over tid, seier medforfattar Daniel Rasse ved NIBIO.

– Når det er sagt, kan samspelet mellom biokol og visse jordmineral og organisk materiale kan bremse nedbrytinga slik at biokolet held seg stabilt i jorda over lang tid.

Ingen karbonhaldige material er heilt stabile

Å forstå kva som styrer varigheita til biokolet i jorda er avgjerande for å berekne klimarekneskap og utvikle god klimapolitikk. Når land og selskap investerer i karbonfangst, er det til dømes viktig at estimata dei brukar for å dokumentere klimaeffekten er pålitelege.

– Biokol kombinerer klimafordelar med betre jordkvalitet. At det kan halde seg stabilt i hundrevis av år, gjer det til eit påliteleg verktøy i arbeidet mot klimaendringar. Samtidig må vi vere tydelege på at ingen material som inneheld karbon er heilt stabile, seier Rasse. Han understrekar at openheit og forskingsbasert kunnskap er avgjerande for å skape tillit hos både styresmakter og marknadar.

Forskaren legg til at det er viktig å ikkje samanlikne biokol med fossilt kol, som har vore lagra i millionar av år djupt under jordoverflata.

– Moderne biokol oppfører seg annleis. Det er veldig stabilt, men går framleis gjennom langsame aldringsprosessar, seier Rasse.

Tilrådingar til politikarar og forskarar

I konklusjonen i kommentaren oppmodar forfattarane til varsemd og klarleik når varigheita til biokolet skal definerast:

• Tenk i hundreår, ikkje evig: Med dagens kunnskap bør biokol reknast som stabilt i hundrevis av år – ikkje tusen eller millionar år. Klimarelevant varigheit krev ikkje evig lagring, men truverdig og målbar stabilitet.
• Følg med på kva vi tilfører: Registrering av biokol og kolets eigenskapar er viktig. Då kan klimaeffekten bereknast på nytt når modellane for nedbryting blir meir presise.
• Invester i meir forsking og feltforsøk: For å auke tilliten til kor lenge biokol varer, trengst det meir grunnleggjande forsking på karbon og langtidsstudiar. Slike forsøk bør undersøkje korleis biokol oppfører seg under ulike forhold – som ulike jordtypar, klima og produksjonsmetodar.

– Biokol er ikkje ei mirakelløysing, men eit kraftig verktøy når det vert brukt rett. Ved å kombinere nøye oppfølging med meir forsking kan vi sikre at biokol leverer på løftet sitt for både klima og landbruk, avsluttar Daniel Rasse.