Varslar at epleskurvsesongen er i gang!

Skurv på eple- og pæretre er ei utfordring som kan føre til øydelagde avlingar og økonomisk tap for bonden. Sjukdommen skuldas ein sopp og er svært utbreidd i Noreg.

Om vêret er varmt og fuktig, kan epleskurvsoppen angripe nye blad før dei faldar seg ut om våren. No har NIBIO fått melding om «grøn spiss» på trea i Ryfylket i Rogaland, og Sandane i Vestland.

Difor varslast det no om fare for angrep av epleskurv i VIPS (Varsling Innan PlanteSkadegjerarar).

Vips – så var sesongen i gang

VIPS er eit nettbasert verktøy utvikla av NIBIO og NLR som skal hjelpe den norske bonden med å ta gode val for integrert plantevern gjennom vekstsesongen. Her finst varsel om fare for angrep av sjukdomar og skadedyr, og fortløpande informasjon om ulike angrep. Meteorologisk institutt leverer vêrprognosar som blir brukt i modellane.

– I  Noreg er dei tidlegaste distrikta for epleskurv Telemark, Jæren, Hardanger og lenger nord på Vestlandet, fortel Håvard Eikemo, forskar ved NIBIO.

– Det er også epleproduksjon i Østfold, Lier-området og på Sørlandet. Dessutan har vi har varsling rundt Mjøsa. Store deler av landet er inkludert.